As mochilas viaxeiras están preparadas para emprender unha nova viaxe cara aos vosos fogares, berberech@s!
Pero… Temos un pequeno problema! Durante as vacacións de verán, Saleta visitou
distintas “bibliotecas de película” e esqueceu as mochilas nalgunha delas. Precisamos
a vosa axuda para recuperalas!
Para
conseguilo, teredes que superar unha serie de retos relacionados coas
bibliotecas que visitou durante as vacacións e descubrir algúns dos seus
segredos. Cada desafío resolto achegaravos un pouco máis á mochila viaxeira da
vosa aula.
Estades
preparados e preparadas para aceptar o reto?
Abride
ben os ollos e os oídos, activade o voso enxeño e traballade en equipo. A aventura
está a piques de comezar e as mochilas viaxeiras agardan por vós!
Que
comece a misión: rescatar as mochilas viaxeiras! 🎒📖
Educación Infantil
Dentro do noso proxecto de centro "Un curso de película", o alumnado de Educación Infantil e do primeiro ciclo de Educación Primaria viviu unha mañá moi especial achegándose ao fascinante mundo do cine e da animación.
Durante a visita ao Curtas, Festival do Imaxinario, descubrimos como nacen as películas a través de exposicións, debuxos, bosquexos e storyboards, coñecendo un pouquiño mellor o traballo que hai detrás da maxia da gran pantalla.
Tamén experimentamos coa ilusión do movemento creando ilusións ópticas cun taumatropo e gozamos dunha viaxe polos primeiros pasos do cine da man de Georges Méliès e a súa película Viaxe á Lúa.
Unha experiencia breve, pero chea de descubrimentos, curiosidade e imaxinación, que nos permitiu aprender que, detrás de cada película, hai moita creatividade e unha chea de historias por contar.
Seguimos facendo do noso curso unha auténtica película! 🎞️💫
Comeza unha nova aventura na biblioteca!
O alumnado de 5º e 6º de Educación Primaria participante no Club de lectura prepárase para vivir un curso cheo de historias, misterios e moitas aventuras. E para comezar por todo o alto, mergullarémonos nunha viaxe extraordinaria da man de Julio Verne e a súa obra Viaje al centro de la Tierra. 🌍
Que nos agardará nas profundidades do noso planeta? Atoparemos criaturas sorprendentes, lugares misteriosos ou segredos agochados?...Só hai unha maneira de descubrilo: abrir o libro e deixar voar a imaxinación!
Estades preparad@s, exploradores e exploradoras? Porque comeza unha aventura lectora máis alá das páxinas!
Este Samaín, a biblioteca énchese de novos misterios, aventuras e personaxes do máis arrepiante.
Momias
misteriosas, vampiros moi peculiares, esqueletos bailaríns, pantasmas
sorprendentes e ata o mismísimo Frankenstein están preparados para saír das
páxinas e converterse nos protagonistas das vosas historias.
Que
aventuras agochan estes libros? Darán moito medo ou farán que non poidades
parar de rir?
Quen
se atreve a abrir o primeiro libro?
Veña, lectores e lectoras valentes! Achegádevos á biblioteca, escollede o libro que máis vos chame a atención e deixádevos levar pola aventura. Se cadra, entre estas páxinas está agardando a vosa próxima personaxe favorita!
Atréveste
a descubrilos? 📖
Hoxe o alumnado de Primaria cambiou por un día a aulas polas butacas do cine para gozar dunha aventura moi especial: Tadeo Jones y la lámpara maravillosa.
Esta actividade, dentro do noso proxecto "Un curso de película", é unha forma divertida e motivadora de achegarnos ao mundo cinematográfico, descubrir novas historias e aprender tamén a través da gran pantalla.
E, como non podía ser doutro xeito, a sesión contou cun ingrediente imprescindible para unha auténtica sesión de cine: unhas deliciosas palomitas!
Luces apagadas, ollos ben abertos e… acción!
Hoxe tivemos a primeira xuntanza do apadriñamento/amadriñamento lector, un momento moi especial para comezar a crear vínculos entre padriños e madriñas e os seus afillados e afilladas de lectura.
Para romper o xeo e favorecer un primeiro achegamento entre os nenos e nenas, compartimos unha actividade creativa na que puidemos traballar xuntos e xuntas: elaboramos marcapáxinas, creamos pequenos recordos, coloreamos debuxos...
A finalidade, que os máis cativos e cativas se sentisen cómodos e cómodas, que comezasen a coñecer aos seus padriños e madriñas e que se establecesen os primeiros lazos de confianza e complicidade.
Este é só o comezo dunha aventura lectora, na que maiores e pequenos terán a oportunidade de aprender, acompañarse e gozar xuntos do pracer de ler.