💜 LECTURAS DIVERSAS: libros para descubrir, aprender e reflexionar 💜

Un espazo cheo de libros e historias para achegarnos a temas como o acoso escolar, o 25N, a igualdade, a diversidade ou a discapacidade. 

Porque ler tamén é unha forma de educar na inclusión, no respecto e na igualdade.

♀️8M. As mulleres que sosteñen Galicia

Cada 8 de marzo, Día Internacional da Muller, lembramos algo fundamental: a igualdade non é só un obxectivo, é un camiño que se constrúe día a día.

Con esta idea realizamos unha actividade especial titulada “As mulleres que sosteñen Galicia”, unha proposta pensada para descubrir, aprender e inspirarse coas historias de mulleres galegas que deixan pegada na nosa sociedade.

A través da mesma, o alumnado tivo a oportunidade de coñecer, de preto, diferentes referentes femininos de Galicia, mulleres que desde ámbitos moi diversos contribúen a facer unha sociedade máis rica, máis xusta e diversa.

Entre elas atopamos:

A Alicia e Xulia, dúas mulleres da Asociación Pés de Barro, exemplo de compromiso social e cultural a través da loita pola conservación da nosa tradición.

.

A actriz galega Anabell Gago, que achega talento e voz á cultura galega.

Ou Bárbara Vázquez Naus, bateeira e actual presidenta do Club de Salvamento e Natación de Vilagarcía de Arousa, unha mostra de liderado feminino.

Tamén tivemos presente a figuras do mundo cultural como Paula Carballeira, narradora, actriz e escritora que leva anos facendo medrar a cultura galega a través da palabra, da escena e da educación.

Pero isto non remata aquí!

A continuación poderedes ver o resultado do traballo do alumnado que permitiu que o alumnado descubrira historias de esforzo, talento e superación, comprendendo que detrás de cada avance social hai persoas que traballan con paixón e compromiso.

Ao mesmo tempo, serviu para reflexionar sobre algo moi importante:
aínda que se conseguiron moitos avances na igualdade entre homes e mulleres, queda camiño por percorrer. Coñecer a estas mulleres e o seu traballo é unha maneira de tomar conciencia do logrado e tamén do que aínda debemos seguir construíndo entre todas e todos.

Malia que o tempo non nos permitiu saír a realizar a manifestación que estaba prevista, iso non restou ilusión nin participación ao alumnado. Para pechar a xornada, o alumnado de Educación Infantil protagonizou unha cacerolada arredor do colexio, enchendo o espazo de son, alegría e reivindicación, nun pequeno pero significativo xesto para facer visible a importancia deste día.

Ademais, creouse un recuncho con lecturas recomendadas, con libros e materiais sobre mulleres galegas en distintos ámbitos: cultura, ciencia, deporte, acción social... Esta selección permitiu que o alumnado seguisse descubriendo historias de esforzo, talento e superación, comprendendo que detrás de cada avance social hai persoas que traballan con paixón e compromiso.

Porque seguir conmemorando o Día da Muller segue sendo necesario: para lembrar, para aprender e para continuar avanzando cara a unha igualdade real.

🌊 Achegas das mulleres á sustentabilidade do mar ♀️

Os corredores do cole convértense nun pequeno espazo de reflexión e aprendizaxe grazas á exposición “Achegas das mulleres á sustentabilidade do mar”, unha iniciativa que nos achega a un tema tan importante como pouco visibilizado: o papel das mulleres no ámbito mariño.

A mostra forma parte dun proxecto promovido pola Deputación en colaboración coa Universidade de Vigo, e non só se queda en paneis informativos, senón que vai moito máis alá.

Leváronse a cabo algúns obradoiros, impartidos pola profesora da UVigo Tamara Amorín, que comezaron cunha charla na que, a través da mirada dunha nena, se explicou o problema da contaminación no mar, facendo reflexionar ao alumnado dun xeito próximo e doado de entender.

O alumnado descubriu o percorrido que seguen alimentos tan cotiáns como o atún en lata, coñecendo todo o proceso desde o mar ata que chega ás nosas casas; e púxose en valor o papel das mulleres neste sector, onde son maioría, pero moitas veces con traballos pouco visibles.

Para rematar, puxeron en práctica o aprendido cunha actividade de separación de residuos, demostrando que pequenos xestos poden facer unha gran diferenza.

 

Durante a xornada recibimos a visita da deputada de Igualdade, que compartiu tempo co profesorado e co alumnado, interesándose pola actividade e apoiando iniciativas que, como esta, constrúen unha sociedade máis xusta e consciente.

Este tipo de propostas deixan pegada. Non só polo que se aprende, senón polas sementes que se plantan: curiosidade, respecto polo medio e unha mirada máis ampla sobre o papel das mulleres no noso día a día.

"Coñece a Rosalía": letras, arte e igualdade

No marco do programa Donas de si, o noso alumnado participou nunha enriquecedora actividade centrada na figura de Rosalía de Castro, unha das escritoras máis importantes da literatura galega e universal.

Ao longo da xornada, o alumnado tivo a oportunidade de achegarse á súa vida e obra, descubrindo curiosidades sobre a súa traxectoria persoal e literaria. A través dunha metodoloxía dinámica e participativa, coñeceron mellor o contexto no que viviu e o valor do seu legado na defensa da lingua e da identidade galega.

Ademais, o alumnado tivo a oportunidade de dar renda solta á súa creatividade realizando a súa propia ilustración de Rosalía, interpretando a súa figura dende unha mirada persoal e artística. Cada debuxo converteuse nun reflexo da imaxinación e da sensibilidade dos nenos e nenas, que puxeron en práctica as súas destrezas no debuxo con resultados moi orixinais e expresivos.

Esta xornada tamén serviu como espazo de reflexión sobre a igualdade entre mulleres e homes, destacando o papel fundamental de figuras femininas como Rosalía na historia. O alumnado amosou unha grande implicación e participación.

Sen dúbida, foi unha xornada na que aprender, crear e reflexionar foron da man.

8M

 Achégase o 8M e dende a biblioteca, creamos esta maleta das  Rosalías do mundo con reccursos para que nas aulas de infantil e primaria traballen unha muller destacada.

Así foi, que cada clase traballou unha das primeiras feministas do mundo, creando unha exposición marabillosa, cuxas ideas foron levadas ao pleno do Concello.

SEMANA DA PRENSA

 Temos moi preto a celebración do 8M e para iso, estamos entrevistando a un montón de mulleres que colaboran con nós para a realización da actividade. Así de ben facemos as entrevistas na radio!

Ademáis, os nenos e nenas de 3º traballaron sobre as noticias espaciais que fomos coñecendo ao longo deste curso.

8M

 Este ano, seguindo a obra da artista Chiharu Shiota, na Escardia, montamos a nosa exposición "Medrando en igualdade", na que se recolle o traballo elaborado durante estes meses de entrevistas a mulleres inspiradoras da nosa contorna, cuxas entrevistas están colgadas na nosa exposición, acompañadas dunha estrutura artística composta de macetas elaboradas polo alumnado nas que se sementamos diferentes cardos, e agasallamos, unha vez rematada a exposición ás mulleres que colaboraron con nós para facer posible este proxecto, sementando igualdade.