A mochila viaxeira dos xogos bótase a andar!

Que emoción! Hoxe comeza unha nova aventura que vén cargadiña de movemento e tradición.

Despois de celebrar un Día do Magosto cheo de brincadeiras e xogos populares galegos o alumnado gañou algo máis ca castañas: unha  mochila de xogos viaxeiros!

Que leva dentro esta mochila tan especial? Pois un pequeno tesouro pensado para xogar en familia e seguir vivindo a emoción dos xogos populares, pero esta vez na casa.

Ao abrir a cremalleira e dependendo do voso curso, poderedes descubrir algúns dos seguintes xogos: a buxaina, lista para bailar na mesa, no chan ou onde lle deades volta; a corda, perfecta para saltar ao ritmo que máis vos guste; a goma, ideal para recordar ou aprender esas rimas de sempre.; as bólas, para poñer a proba a puntería de toda a familia....e algunha outra sorpresa que fará que a visita da mochila sexa inesquecible.

Todos estes xogos están dentro da mochila, preparados para compartir momentos divertidos, retos e moitas risas.

Cal é o obxectivo? Moi sinxelo e moi bonito, pasalo ben aprendendo.

Xogando fortalecemos lazos, movémonos, compartimos e, case sen darnos conta, aprendemos tradición, cultura, perseveranza, creatividade e cooperación.

Como funciona?

A mochila irá pasando de casa en casa. Cada familia poderá gozala durante uns días e, se quere, pode deixar dentro un debuxo, unha foto ou unha pequena nota contando a súa experiencia. Ao final do curso teremos unha gran crónica viaxeira chea de historias divertidas.