🎭 Entroido á galega! Oficios con moito xeito e tradición 🎶

Este ano celebramos un Entroido moi noso, un Entroido á galega, no que a tradición, os oficios de sempre e a nosa cultura foron os grandes protagonistas. O centro encheuse de cor, ilusión e moitísimo talento!

🌊 Infantil: grandes profesionais do mar.

O alumnado de Infantil mergullouse no mundo mariñeiro. Puidemos ver auténticas e auténticos profesionais do mar: mariñeiros e pescadoras, mariscadores/as, redeiros/as… Parecía que o mar entrara no cole! Non faltaron as redes e os capachos e, sobre todo, os sorrisos salgados de ilusión.

🌾 1º e 2º de Primaria e a vida de aldea

O rural galego tamén tivo o seu merecido protagonismo. Agricultoras/es, panadeiros/as, leiteiros/as… e mesmo algún que outro animaliño da granxa paseando polo ximnasio!

Foi unha homenaxe preciosa á vida na aldea, aos traballos de sempre e ás mans que coidan a nosa terra.

 

⚓ 3º e 4º de Primaria e a Galicia con sabor a mar

O alumnado de 3º e 4º volveu traer o mar ao noso desfile con: bateiras/os, redeiras/os, mariñairos/as, pescadores/as, maristacores/as… e algún que outro guía do Parque Nacional marítimo terrestre das Illas Atlánticas.

Un auténtico porto pesqueiro instalado no ximnasio!

 

🎶 5º e 6º de Primaria. A ritmo de Rondalla!

E cando parecía que xa non se podía superar… chegaron 5º e 6º con moito ritmo e alegría, convertidos en auténticas rondallas!

Pandeiretas, movemento, coordinación e moitísima enerxía fixeron vibrar o ximnasio enteiro.

É certo que este ano a predición meteorolóxica non nos deu tregua. A chuvia non nos permitiu saír ao exterior como é costume, pero... é que cando hai ganas, ilusión e espírito de Entroido non hai nube que o pare e o ximnasio converteuse no noso mellor aliado para desfilar!

E como broche de ouro, puidemos rematar a xornada todos xuntos cantando e bailando “Eu quero entroidar” ao ritmo de Sony e Selena. Voces a todo pulmón, mans no aire e unha enerxía que contaxiaba alegría por todos os recunchos!

Pero aínda quedaba unha sorpresa final… Rematamos a xornada merendando xuntos nas aulas, compartindo risas, conversas e esa felicidade que só o Entroido sabe crear.

E o broche definitivo púxoo o delicioso chocolate preparado pola ANPA para todo o alumnado. Quentiño, saboroso e feito con moito agarimo… foi o complemento perfecto para un día tan especial.

Queremos agradecer de corazón á ANPA a súa implicación constante, o seu traballo e este detalle tan estupendo que fixo que o noso Entroido fose, se cabe, aínda máis doce. 💛

O noso Entroido non é só un disfraz. É cultura, identidade e comunidade.

🎭 Eu quero Entroidar… e ti?