Con motivo da celebración das Letras Galegas, o alumnado de
2º e 4º de Educación Primaria participou no Festival Escolar das Letras Galegas
2026, celebrado no Auditorio, xunto a outros centros da localidade.
Agasallaron aos espectadores e espectadoras con dúas
representacións moi especiais relacionadas coa cultura galega e plenamente
integradas dentro do noso proxecto de centro "En galego!".
O alumnado de 2º de Primaria sorprendeu ao público cunha
emotiva dramatización centrada no mundo das palabras: "Os contadores das palabras perdidas". A través da
interpretación, da expresión corporal e dunha posta en escena chea de
sensibilidade, conseguiron transmitir a importancia da lingua, da comunicación
e das emocións que agochan as palabras. Foi unha actuación moi agarimosa e
coidada.
Pola súa banda, o alumnado de 4º de Primaria fixo gozar a
todos cun sketch titulado “E ti, de quen ves sendo?”, xogando arredor desa frase
tan nosa e tan galega cun toque de humor, espontaneidade e moita naturalidade.
Ambas actuacións deixaron claro que o talento para a
dramatización tamén forma parte das nosas aulas.
O alumnado puxo o mellor de si e demostrou grandes habilidades para interpretar, expresarse no escenario e facer chegar ao público tanto a emoción como o humor.
No hay comentarios:
Publicar un comentario